🚨 वडगाव निंबाळकर येथे नवनियुक्त प्रभारी API जीवन मोहिते यांच्या अध्यक्षतेखाली पोलीस-पत्रकार बैठक संपन्न; अवैध धंद्यांचे कंबरडे मोडणार..!

vadgaon Nimbalkar

वडगाव निंबाळकर:परिसरातील कायदा व सुव्यवस्था अधिक मजबूत करण्यासाठी आणि गुन्हेगारी प्रवृत्तींना जरब बसवण्यासाठी वडगाव निंबाळकर पोलीस ठाण्यात एक अत्यंत महत्त्वाची पोलीस-पत्रकार समन्वय बैठक नुकतीच पार पडली. सदर बैठक वडगाव निंबाळकर पोलीस ठाण्याचे नवनियुक्त प्रभारी सहाय्यक पोलीस निरीक्षक (API) जीवन मोहिते साहेब यांच्या अध्यक्षतेखाली संपन्न झाली. या बैठकीला वारुळे साहेब आणि त्यांचे सर्व सहकारी प्रामुख्याने उपस्थित होते. लोकशाहीचा चौथा स्तंभ असलेल्या प्रसारमाध्यमांच्या माध्यमातून स्थानिक प्रश्न प्रशासनासमोर आणणे आणि गुन्हेगारी मोडीत काढणे हा या बैठकीचा मुख्य हेतू होता..!
पालकांनो सावधान!
अल्पवयीन मुलांच्या हाती वाहन दिल्यास थेट गुन्हामुख्य चौक आणि शाळा-महाविद्यालयांच्या परिसरामध्ये अल्पवयीन मुलांकडून बेदरकारपणे आणि वेगाने दुचाकी चालवल्या जात असल्याच्या तक्रारी पत्रकारांनी बैठकीत मांडल्या. यावर नवनियुक्त प्रभारी API जीवन मोहिते साहेब यांनी अत्यंत कडक भूमिका घेतली आहे. यापुढे कोणत्याही १८ वर्षांखालील अल्पवयीन मुलाकडे वाहन आढळल्यास केवळ मुलावरच नाही, तर थेट त्याच्या पालकांवर गुन्हा दाखल करून २५ हजार रुपयांपर्यंतचा दंड वसूल केला जाईल, असा सज्जड इशारा त्यांनी दिला. यासाठी पोलिसांचे विशेष पथक आणि त्यांचे सहकारी रस्त्यावर उतरून धडक तपासणी मोहीम राबवणार आहेत..!
अवैध दारूधंद्यांचे कंबरडे मोडणार: गावोगावी आणि अंतर्गत भागात छुप्या मार्गाने चालणाऱ्या बेकायदेशीर दारूविक्रीमुळे कौटुंबिक शांतता बिघडत असून तरुण पिढी उद्ध्वस्त होत आहे. या समस्येची गंभीर दखल घेत मोहिते साहेब आणि त्यांच्या सहकारी पोलीस कर्मचाऱ्यांनी अवैध दारूविक्रीचे अड्डे पूर्णपणे नष्ट करण्याचे नियोजन केले आहे. दारूची बेकायदेशीर वाहतूक आणि छुप्या पद्धतीने विक्री करणाऱ्यांवर अजामीनपात्र कडक कलमांखाली गुन्हे दाखल करण्याचे संकेत या बैठकीत देण्यात आले..!
माहिती देणाऱ्याचे नाव राहणार सुरक्षित आणि गुप्त” राहणार –
समाजातील शांतता टिकवून ठेवण्यासाठी पोलीस आणि पत्रकार यांच्यात निरंतर आणि मजबूत संवाद असणे गरजेचे आहे,” असे मत नवनियुक्त प्रभारी API जीवन मोहिते साहेब यांनी व्यक्त केले. परिसरातील अवैध धंदे, मटका, जुगार, फॅन्सी नंबर प्लेट किंवा इतर कोणत्याही संशयास्पद हालचालींची माहिती नागरिकांनी थेट वडगाव निंबाळकर पोलिसांना द्यावी. माहिती देणाऱ्या नागरिकाचे नाव पूर्णपणे सुरक्षित आणि गुप्त ठेवले जाईल, अशी ग्वाही पोलीस प्रशासनातर्फे देण्यात आली..!
या बैठकीनंतर वडगाव निंबाळकर पोलिसांनी आपला मोर्चा गुन्हेगारांकडे वळवला असून, आगामी काळात तालुक्यात पोलिसांची कडक कारवाई पाहायला मिळणार आहे..!