महाराष्ट्रातील नंदनवन प्रसिद्ध असणाऱ्या ताम्हिणी घाटाचे सौंदर्य, ‘अंधारबन’चा थरार आणि देवकुंड-सावळ्या घाटाचे निसर्गरम्य आकर्षण..!

पर्यटन बातमी,पुणे/रायगड –

सह्याद्रीच्या उत्तुंग रांगा, डोंगरांवरून कोसळणारे दुधाळ धबधबे, दाट धुक्याची शाल आणि हिरवीगार निसर्गसंपदा… निसर्गाच्या या निसर्गरम्य रूपाचा अनुभव घ्यायचा असेल तर ‘ताम्हिणी घाट’ आणि परिसर हे पर्यटकांचे आणि निसर्गप्रेमींचे सर्वात आवडते ठिकाण बनले आहे. पुणे आणि कोकणाला जोडणारा हा मार्ग केवळ एक प्रवास नसून निसर्गाच्या अद्भुत दुनियेत घेऊन जाणारा एक अविस्मरणीय अनुभव आहे..!

महाराष्ट्रातील प्रसिद्ध घाटापैकी एक ताम्हिणी घाट – धुक्याची शाल आणि धबधब्यांचा नजराणामुळशी धरणाच्या विस्तीर्ण पाठीमागील जलाशयापासून सुरू होणारा ताम्हिणी घाट हा महाराष्ट्रातील सर्वात सुंदर ‘रोड-ट्रिप’ मार्गांपैकी एक मानला जातो. पावसाळ्यात घाटाच्या दुतर्फा कोसळणारे छोटे-मोठे शेकडो धबधबे आणि रस्त्यावर पसरलेले दाट धुकं पर्यटकांना भुरळ घालते. घाटातील ‘प्लस व्हॅली’ आणि ‘कुंडलिका व्हॅली’ पॉईंटवरून दिसणारी खोल दरी निसर्गाच्या भव्यतेची जाणीव करून देते..!

🌲अंधारबन ट्रेक: दिवसाही जिथे सूर्यप्रकाश पोहोचत नाही!साहसी पर्यटकांसाठी ‘अंधारबन ट्रेक’ हा एक वेगळाच थरार आहे. नावाप्रमाणेच हे जंगल इतके दाट आणि घनदाट आहे की, भर दुपारीही जमिनीवर सूर्यप्रकाश पोहोचत नाही..! ट्रेकचे स्वरूप हा साधारण १३ ते १४ किलोमीटरचा ‘डिसेंट ट्रेक’ (डोंगर उतरणारा मार्ग) असून तो पिंपरी गावापासून (मुळशी) सुरू होऊन भिरा गावात संपतो.

वाहते ओढे, निसरड्या पाऊलवाटा, दाट झाडी आणि शेकरू (महाराष्ट्राचा राज्य प्राणी) यांसारख्या वन्यजीवांचा वावर हे या ट्रेकचे मुख्य आकर्षण आहे. परवानगी अनिवार्य – वनविभागाने सुरक्षेच्या कारणास्तव येथे प्रवेश शुल्क आणि अधिकृत गाईड असणे बंधनकारक केले आहे.

🌊 देवकुंड धबधबा – सह्याद्रीच्या कुशीतील लपलेला पाण्याचा स्वर्गअंधारबनच्या पायथ्याशी असलेल्या भिरा/पाटणूस गावातून सुरू होणारा ट्रेक पर्यटकांना ‘देवकुंड धबधब्या’कडे घेऊन जातो. तीन वेगवेगळ्या ओढ्यांचे पाणी एकत्र येऊन एका प्रचंड दरीतून खाली पडते आणि खाली एक निळसर पाण्याने भरलेला नैसर्गिक तलाव (कुंड) तयार होतो. भिरा गावातून साधारण ५ ते ६ किलोमीटर जंगलातून आणि ओढ्यांतून पायपीट केल्यानंतर हा धबधबा दिसतो.

कुंडामधील पाण्याचा अंदाज येत नसल्याने आणि पाणी खोल असल्याने प्रशासनाने तिथे उतरण्यास आणि पोहण्यास सक्त मनाई केली आहे.

🌲🌳🌴सावळ्या घाट – शांतता आणि एकांताचा शोध घेणाऱ्यांसाठीताम्हिणी परिसरातील ‘सावळ्या घाट’ हा अजूनही फारसा व्यावसायिक न झालेला, निसर्गाच्या जवळ असणारा शांत मार्ग आहे.

मुख्य रस्त्यावरील गर्दीपासून दूर असलेल्या या घाटातून प्लस व्हॅली आणि देवकुंडचा उगम अत्यंत विहंगम दिसतो.निसर्गभ्रमंती,फोटोग्राफी आणि निवांत क्षण घालवण्यासाठी सावळ्या घाट हा उत्तम पर्याय ठरत आहे..!

या संपूर्ण परिसरात मोबाइल नेटवर्क नगण्य किंवा पूर्णपणे बंद असते. त्यामुळे पर्यटकांनी आधीच आपल्या कुटुंबाला कल्पना देऊन ठेवावी.

जंगल आणि घाटात रस्ता भरकटण्याची शक्यता असल्याने स्थानिक ग्रामस्थांची/गाईडची मदत नक्की घ्यावी. हा सर्व परिसर प्लास्टिकमुक्त ठेवण्याचे आवाहन प्रशासनाकडून करण्यात आले आहे. त्यामुळे कचरा सोबत परत आणावा..!

भिरा, पिंपरी आणि ताम्हिणी परिसरातील स्थानिक महिलांनी सुरू केलेल्या खानावळींमध्ये गरमागरम पिठलं-भाकरी, सुका मटण/चिकन बेत आणि सोलकढीचा अस्सल ग्रामीण स्वाद अनुभवता येतो..!

जर तुम्हालाही वीकेंडला शहराच्या धावपळीपासून दूर जाऊन निसर्गाच्या कुशीत रिचार्ज व्हायचे असेल, तर ताम्हिणी घाट, अंधारबन आणि देवकुंडची ही सफर तुमच्या नक्कीच लक्षात राहील..!